Мошьюга петкöдлö миянлы не сöмын изьваса гражданскöй зодчестволысь историясö. Эм тані енлы эскана стрöитöм памятник, кодöн окота тöдмасьны.

XVIII нэмся овтöм грезд вочасöн быдмис да XIX нэмын Мошьюга лои сиктöн. Быд сиктын тайö кадö вöлі вичко. Тані стрöитісны колян нэмлöн мöд джынъяс. Вичколöн торъя тöдчанлуныс - кöлöкöльнича.

           Мошьюга сиктса Кöлöкöльнича (1884). Фото Ю. Д. Рыбаковлöн

Кыпöдлісны сійöс 1884 воын ниа пуысь сотчöм вичко местаö. Мошьюга эз вöв сэтшöм озыр сиктöн, кыдзи Изьва, Мокчой, Сизяб, да изйысь вичко стрöитны эз вермы. Но и мукöдысь кольччыны сиктсаяс эз кöсйыны. Татчöс тшупсьысьяс вöчисны пу кöлöкöльнича дзик жö сэтшöмöс, кыдзи мокчойсаяслöн. И, колö шуны, лои нöшта мичаджыкöн.

Кöлöкöльничаыс куим рада. Вöчöма зэв стöча. Быд рад торйöдöма да содтöд мичмöдöма сюръяясöн. Ыджыд кужöмлунöн серöдлöма сюръяяслысь вылыс юкöнсö. Сухарикъясöн мичмöдöм карнизъяс сідзжö сетöны позянлун чайтны, мый тайö изйысь вöчöм стрöйба. Мылькъя нёль сигöра вевт помасьö ёсь йыв вылын крестöн.

Кольö сöмын шензьыны тшупсьысьяслöн кужöмлунлы, вевсьöн-вевсьöн куим судта ыджда стрöйба кыпöдысьяслы, öд кöлöкöльничаыс сулалö нин сё во да весиг эз на вöрзьы. Юрнуöдіс стрöитчöмнас Канев, ачыс Красноборысь, Изва юса кывтыдладор сиктысь. Тайö - изьваса мастеръяслы памятник.