С.Я. Маршак нима челядьлы национальнöй библиотека

Сöветскöй улича, 20

Водзын керкаыс вöлi П.М. Камбалов купечлöн (1861-1938). Томдырсянь сiйö чöжис озырлунсö: Усть-Сысольскса купеч Сычёв дорын приказчикалiс, ветлiс Вяткаö тöварла, вузасис магазинын, вöчис кучик, дöра вылын серпасасис. 1912-öд воö, озырмöм бöрын, карса шöр улича вылын лэптiс изйысь кык судта керка, улiас восьтiс вузасянiн да кутiс тöргуйтны ылi муясысь вайöмторöн – чайöн, кофеöн, специяясöн, сакарöн да мукöдторöн. Мöд судтаас öти джынъяс овмöдчис семьянас, мöд джынcö cетлiс овмöдчысьяслы.

Большевикъяс локтöмöн, Камбаловлысь керкасö босьтiс муниципалитет. 1937-öд воö вöвлöм купечöс мыждiсны, 1938-öд воö сiйö кувсис Усть-Вымлагса совхозын. 1958-öд воö мыж абутöм вöсна реабилитируйтiсны.

Сöвет кадö керкаас вöлiны уна сикас учреждениеяс: 1932-49 воясö республикаса библиотека (öнi Коми Республикаса Национальнöй библиотека); улыс судтаас вöлiны вузасянiнъяс. 1965-öд воö вылыс судтаыс вуджис Сыктывкарса карса челядь библиотекалы, 1981-öд воö сылы вуджис и улыс судтаыс.

Источник:

Дом родной, знакомый с детства: экскурсия-путешествие по городу Сыктывкару / Центральная городская библиотека.- Сыктывкар, 2006. – 188 с.