Коми Республикаса национальнöй музей

И.А. Куратовлöн литературно-мемориальнöй музей

Орджоникидзе нима улича, 2

Медводдза пöвсö пуктöма 1969-öд воö. Мöдсö – 1979-öд воö.

«Карын медводдза из керка. Танi 1850-1918-öд воясö вöлi Вылыс тшупöда начальнöй училище. Сылöн велöдчысьяс пöвстын – Октябрса революцияын участникъяс, медводдза партийнöй да сöветскöй уджалысьяс, культураын да наукаын тöдчана йöз».

Карын медваж из стрöйба – купеч С.Г. Сухановлöн кык судта особняк. (Орджоникидзе,2).

С.Г. Сухановлöн керка йылысь медводдза гижöдпасыс вöлi вöчöма 1801-öд воö, кор купечлы сетiсны позянлун лэптыны изйысь кык судта керка, 413 план местын 23-öд кварталын. Абу тöдса, кор заводитiсны да кор помалiсны керка лэптöмсö.

1846-öд воö керкасö ньöбисны уездса училище улö. Керкасö вежлалiсны-дзоньталiсны: улыс судтаын вöчисны смотрительлы оланiн, вылыс судтаас лоис куим класса велöдчанiн.

1897-öд воö училище бердын воссис ки помысь пу кöлуй вöчан класс. Та вылö 1906-öд воö училище стрöйбакöд орччöн лэптiсны куим ыджыд вежöса торъя пу стрöйба.

1912-öд воö училище лоис вылыс тшупöда начальнöй школаöн, 1918-öд воö – сöветскöй школаöн, 1919-öд воö танi воссис партийнöй школа.

1924-öд вося ноябр 2-öд лунö Суханов керкаын вöлi восьтöма Коми областнöй музей (öнi Коми Республикалöн национальнöй музей).

2001-öд воö стрöйбасö дзоньталiсны, öнi сэнi литературнöй музей.

Источник: Дом родной, знакомый с детства: экскурсия-путешествие по городу Сыктывкару/ Центральная городская библиотека.- Сыктывкар, 2006. – 188 с.