Коми Республикаса национальнöй музей

Этнография юкöн

Коммунистическöй улича, 2

                                 История да культура памятник

             Дербенёвъяслöн вузасян керка 1899-1900; 1906-1907 вояс

                                                 Видзö канму

Кык судтаа вузасян керкалöн шöр юкöныс вöлi лэптöма 1899-1900-öд воясö галантереяöн да мануфактура вöчöмторъясöн вузасянiн улö. Медводдза кöзяиннас вöлi Устюгысь II гильдияса купеч Ф.И. Охлопков. 1906-öд воö магазиныс вуджö Устюгса купечьяс Дербенёв вокъяс дорö. 1906-1907 воясö кык судтаа магазинлöн кыкнанладорсяньыс содтöны улича кузя нюжалöм öти судтаа «бордяс».

Народнöй Комиссаръяс Сöветлöн декрет серти 1918-öд вося июнь 28-öд лунö магазин стрöйбаыс вöлi национализируйтöма. 1918-öд вося июнь тöлыссянь 1919-öд вося ноябр тöлысьöдз улыс судтаас уджалiс коммунистъяслöн «Звезда» клуб.

Мöд судтаас вöлi Усть-Сысольскса РКП (б) горком. Танi жö 1918-öд вося декабр тöлысьö мунiс Усть-Сысольск уездса коммунистъяслöн медводдза съезд. 1919-öд вося октябр 28-öд лунö танi вöлi чукöртчöм, кöнi котыртiсны Коми муын РКСМ-лысь медводдза ячейка.

1922-1935-öд воясö стрöйбаын вöлi карса типография, сэсся «Универмаг», а 1990-öд вояс заводитчытöдз «Мебель» магазин. 1997-1998-öд воясö стрöйбасö дзоньталöм бöрын сiйöс сетiсны Коми Республикаса Национальнöй музейлы этнография юкöн улö.

Стрöйбасö кыдз история памятник видзö канму.

Источник:

Дом родной, знакомый с детства: экскурсия-путешествие по городу Сыктывкару/ Центральная городская библиотека.- Сыктывкар, 2006. – 188 с.