Киров нима улича, 44

Революцияöдзса Усть-Сысольскын тайö стрöйбаыс вöлi медыджыдöн. Духовнöй училище вöлi cэнi дас кык во чöж.

1875-öд воö кöсйöмаöсь лэптыны нöшта öти кык судтаа из керка, кöнi эськö вöлiс и училище, и общежитие, но сьöм абутöм вöсна общежитиеысь эновтчисны. Проектсö лöсьöдiс Губернияса архитектор Фёдоров. Дасьтысян удж мунiс дас во чöж.

1888-öд воö комиссия вынсьöдiс сёрнитчöмсö шöр подрядчик Благовещенскöй вöлöсьтса крестьянин Н.Г. Кононовкöд. 1888-öд вося май 10-öд лунö вöлi пуктöма стрöйбалы пöдувсö. Пуысь коланаторъяс да вевт вöчис крестьянин С.Творожников, а веськöдлiс став уджнас инженер Г. Лазарев.

1890-öд вося октябр 28-öд лунö кыпыда восьтöма духовнöй училище.

Бöрынджык решитöма вöчны содтöд стрöйба. Проектсö лöсьöдiс архитектор Лебединский, а керка лэптöм вылö заказсö сетöма Н. Кононовлы. 1905-1906-öд воö тайö вöлi вöчöма.

Архитектура памятник. 1890-öд вося духовнöй училищелöн стрöйба. Архитектор Фёдоров.

Бöрынджык тайö стрöйбаас вöлi духовнöй училище, 1919-öд воö Гöрд Армиялöн Пинего-Печорскöй крайса войскояслöн Штаб, педагогика техникум, пединститут, педучилище, велöдысьясöс сöвмöдан институт.

Коми Республикалöн национальнöй галерея – тайö изобразительнöй искусствояслöн Музей. Музейкöд орччöн эм «скульптураяслöн сад», сiйö кадысь кадö содö «Финн-угор мир» пленеръяс дырйи выль вöчöмторъясöн.

Стрöйбаыс лоö архитектура да зодчестволöн памятникöн.

Источник: Дом родной, знакомый с детства: экскурсия-путешествие по городу Сыктывкару / Центральная городская библиотека.- Сыктывкар, 2006. – 188 с.