Коми область лои медводдза регионъясысь öтиöн, кöнi 1929 воын заводитiс котыртчыны уджöн мыж вештан лагеръяслöн инас.

Ставыс лои СЕВЛОНсянь, сэсся воссисны Локчимлаг, УхтПечлаг, Воркутлаг, Усть-Вымлаг, Севжелдорлаг, Печлаг, Интлаг, а война бöрти нöшта кутiсны уджавны Речлаг да Минлаг торъя урчитöм лагеръяс.

1932-öд воын Коми обласьтса лагеръясын пукалiсны 10 сюрс гöгöр морт, 1938-öд воын – 79 сюрс, 1941-öд воын вöлi нин 186, 4 сюрс, а 1950-öд воын лыдыс содiс 242,8 сюрсöдз.

Но и талун ми огö вермöй шуны, кымын морт прöйдитic лагеръяс пыр, медым лыддьöдлыны налысь нимъяссö, кодъяс перйисны ухтаса мусир, воркутаса да интаса из шом, стрöитicны Войвыв-Печораса кöрт туй да миянлысь войвывса каръяс.

Кансям мыждöмъяс суисны и татчöс олысьясöс. Уна коми крестьянинöс вöлi кулакалöма. 10 сюрсысь унджык морт пукалiсны политическöй мыж вöчöмысь. Мыжтöм мыжаясöн лоины кыдзи крестьяна, сiдз и уджалысь да чина морт, том коми интеллигенция да поп-дяк.

Коми мулы уси шог пай, кöнi не сöмын восьталiсны лагеръяс, татчö ыстiсны сiдзжö нарошнö олöм вылö йöзöс. 1930-öд восянь, кор Комиö воисны медводдза кулакалöм крестьяна, да 50-öд вояс шöрöдз, вöлi ыстöма 100 сюрсысь унджык нарошнö олöм вылö морт. На пиын вöлiны полякъяс, немечьяс-трудармеечьяс да чужан муö бöр локтысьяс, литваса да рытыв украинаса йöз, немеч пленысь мездöм сöветскöй салдатъяс.