Россия Федерацияса Коми Республикалöн дöрапас – канму пас. Öнiя уджалысь флагсö вöлi вынсьöдöма 1997-öд вося öшым 17-öд лунö да пыртöма Россияса Федерация Государстволöн канпаса лыддьöгö 154-öд номер улын.

Дöрапас – тайö нёль пельöса дöра, артмöма водсанога сьöрсьöн-бöрсьöн мунысь лöз, турунвиж да еджыд рöма куим визьысь.

Флаглöн рöмъясыс петкöдлöны Коми Республикалысь география да озыр вöр-валысь аслыспöлöслунсö. Лöз рöм – енэж рöм, помтöм-дортöм войвыв мич. Турунвиж рöм – тайö коми парма, коми йöзлöн медшöр озырлун. Флаглöн еджыд рöм вежöртасыс – лым сöстöмлун да войвыв вöр-валöн мичлун. Еджыд рöмнас жö петкöдлöма, мый Коми республикаын олысь став войтырыс олö öтсöгласын.

Öнiя дöрапассö серпасалiс Сердитов Владимир Яковлевич (Сыктывкарын олысь Россияса Федерацияса серпасалысь котырö пырысь Коми Республикаын пыдди пуктана уджалысь).

 .

Коми Республикаса канпас

Сылысь вежöртассö вайöдöма 1994-öд вося лöддза-номъя 6-öд лунö Медвылыс Сöветлöн XII cессия вылын примитöм оланпасын.

Коми Республикаса канпас дасьтöма перымса звер стиль подув вылын. Гöрд геральдическöй пöв вылö серпасалöма зарни лэбач. Сылöн морöсын – квайт йöра юрöн кытшалöм нывбаба чужöм. «Лэбач-морт-йöра» композицияын тыдовтчöны коми йöзлöн мифоэпическöй видзöдласъяс.

Восьса бордъяса лэбач петкöдлö шондi, власьт да вылыс енкöла.

Лэбач морöсын нывбаба вежöртö  олöм сетысь Зарни Аньöс.  Йöра пыр петкöдлöма республикаын олысь йöзлысь вын, веськыдлун, мичлун.

Зарни да гöрд рöмъяс коми фольклорын öткодявсьöны асъя, тувсовъя, шоныд шондiкöд, кага чужтöм-быдтöмкöд.

Паськöдöм бордъяса лэбач дась лэбны дöзьöритны-видзны Чужан му да сэнi олысь йöзöс, отсавны налы водзö сöвмыны. Петкöдлö тшöтш нянь-солöн вочаалöм, öтвылысь уджавны дасьлун.

Öнiя канпас дасьтысь – Неверов Анатолий Иосифович. 

.

Коми Республикаса кып  

Примитöма: 1994-öд вося лöддза-номъя 6-öд лунö.

Коми Республикаса кып – демократия инöда канму, национальнöй культуралысь традицияяс видзöмлöн символ. Кыплысь шыладсö дасьтöма М. Герцманöн лöсьöдöм Виктор Савинлысь «Варыш поз» сьыланкыв подув вылын.

 .

Ылын-ылын Войвылын

Джуджыд парма сулалö.

Парма шöрын варыш поз

Кыпыд горöн шыалö.

 .

Лэбзьöй, повтöм варышъяс,

Вына бордъяс шеныштлöй,

Веськыд туйöд нуöдöй,

Коми мусö югдöдöй!

(Коми кыв вылын В. Савинлысь кывъяссö лöсьöдic В. Тимин, роч кыв вылын редакция вöчисны А. Шергина да А. Суворов).