Коми Республика пырö Россия Федерациялöн чукöрö, Рытыв-Войвыв федеральнöй кытшö да лоö öткодь правояса субъектöн.

Орччöн сулалöны Ненецкöй асшöрлуна кытш, Ямало-Ненецкöй асшöрлуна кытш, Ханты-Мансийскöй асшöрлуна кытш, Свердловск, Киров да Архангельск обласьтъяс, Перм край.

                                  А. Б. Свидерский. В верховьях р. Усть-Унья 

Коми Республикаын 12 администрация район, 10 кар (республикаса тöдчанлунаыс - 8). Сыктывкар лоö юркарöн.

Республикалöн мутасыс ловзис 300 сюрс во сайын. Важолысьяс, коми йöзкостса преданиеясын найöс шуöмаöсь чудьöн, заводитiсны овмöдны Эжва вож миян эралöн 1 сюрс волöн мöд джынйын, а Печора вож - сöмын миян эралöн 2 сюрс волöн мöд джынйын.

Республикаын эм мезолит кадколаста сёысь унджык памятник (миян эраöдз 9-6 сюрс во), кодъяс пиысь медся тöдсаяс - Ульяна да Кузьвомын. Эжва да Печора заводитісны овмöдны Волго-Окскöй кык ю костсянь да Прикамьесянь. Йöз олicны эз нин рудöг увын, а ю да ты бокъясын кыпöдöм стрöйбаясын. Неолитын, бронза да водз кöрт нэмын заводитiсны котыртчыны овмöсъяс.

XI нэм кежлö коми артмöдчис кыдзи войтыр. Овмöдчисны Эжва, Емва, Висер, Сыктыв, Луза юяс пöлöн да некымын орчча обласьтъясын. IV-XVI нэмъясын сöвмöны скöт видзöм да видз-му вöдитöм. XII-XIV нэмъясын Емва, Улыс Эжва, Сыктыв да Луза юяс пöлöн кыпалöны зумыд важдырся роч овмöсъяс.

Паськалöны вузасян йитöдъяс орчча да ылi муяскöд.

60-öд вояссянь XIII нэмын комилöн «Пермь» да «Печора» му нимъяс пырисны новгородса вöлöсьт лыддьöгö, а XV нэм пом кежлö тайö мутасыс лои Роч канму юкöнöн. XVI нэмсянь коми да роч йöз öтвылысь кутiсны овмöдны Эжва йыв, Мозын да Печора вожъяс.

1708 воын некымын коми мутас вöлi пыртöма Архангельск губернияö.

Усть-Сысольск уезд, кодi котыртчис 1780 воö, пырис Вöлöгда губернияö.

XIX нэм помын Архангельск губернияысь торйöдчис Печора уезд. Тайö кад кежлас помöдз  лöсялic коми войтырлöн мутасыс.

1921 вося моз 22 лунö примитiсны комилысь асшöрлун йылысь декрет. 1929 воын Коми асшöрлуна обласьт пырис выль котыртöм Войвыв крайö, Архангельск лои администрациялöн юркарöн. 1936 вося öшым 5 лунö асшöрлуна обласьт кутіс шусьыны Коми Автономнöй Сöветскöй Социалистическöй Республикаöн.

1990 вося вöльгым 23 лунö республика лои Коми ССР, 1992 вося ода кора 26 лунсянь кутiс шусьыны Коми Республика. 1994 вося урасьöм 17 лунся выль Оланподув серти Коми Республика (государство) лои Россия Федерациялöн öткодь правояса субъектöн.

***

Олысьяс

Комиын артавсьö 830, 2 сюрс олысь (2019 вося тöв шöр 1 лунö), на пиысь 723 сюрс карса олысь да 228 сюрс сиктса йöз. 2002 вося йирым 9 лун вылö Россияса став йöзöс гижалöм серти 25, 2 % олысьыс – коми, рочьяс – 59, 6 %, украинаса – 6, 1 %, мукöд сикас войтырыс – 9 %.

Шöр арлыд : 34, 5 во.

Дыр олысь – 100 арöс да нöшта ыджыдджык – 13 морт.

Мукöдъясысь дырджык олöны республикалöн лунвылын – Луздор районын, этшаджык - Воркутаын.

2002 вося йирым 9 лун вылö Комиын олö 1,019 млн. морт, на пиысь 766, 6 сюрсыс – карса олысь.

***

Коми Республикаын лöсьöдöма ывлавыв-заповеднöй фондлысь вез, кытчö пырö торъя дöзьöритан уна сикас мутас. Öтлаын найö босьтöны 6 млн. гаысь унджык места, тайö лоö став республика мутаслöн сизимöд юкöныс.

01.01.2009 вося лыддьысьöм серти республикаын артавсьö 242 дöзьöр улö босьтöм уна сикас мутас, на пиысь кыкыс - федеральнöй (Печора-Илыдзса государстволöн заповедник да национальнöй парк «Югыд ва»), 240 - республиканскöй (165 государстволöн ывлавывса заказник да 75 вöр-ва памятник).

Быдмöгъяслöн медшöр сикасъяс – вöрса да нюрса. Кызвын дöзьöритан мутаслысь пертассö позьö тöдмавны вöръяс да нюръяс серти.

Комилысь вöр ылтаслысь ыдждасö оз позь öткодявны не сöмын Россиялöн Европаса бердöг серти, но и босьтны кö Европасö дзоньнас. Вöр видзöм могысь котыртöма 48 сюрс га ыджда 20 заказник да 18 вöр-ва памятник, на пиысь меддонаторйыс – кöні быдмö сус пу.

Нюръяс да вöръяс öтшöтш кутöны вöр-ва видзанлысь öтвесьталунсö. Öнія лун вылö дöзьöр улö босьтöма 113 нюр (16 донъявсьöны наука боксянь, мукöдыс – нюр-вотöсаинъяс). Татчöс гежöд быдмöгъяс отсалöны овны ваын уялысь да ва гöгöрын олысь лэбачьяслы. «Усинскöй» да «Мартюшевскöй» нюръяс асланыс öбича серти зэв коланаöсь уна сикас лэбачлы да веськалöны Рамсарскöй конвенция улö. Дöзьöритан мутас лыдö веськалö сідзжö «Океан» нюр заказник.

Регионса Гöрд небöгын артавсьö 535 пöлöс шоч быдмöг. На пиын виж юра дзуртан турун, куим юра вöр купальнича, марьямоль да уна мукöд. Комиын торъя дöзьöритан мутасъяслысь вез лöсьöдöм сетö позянлун видзны пемöсъяслысь лыдсö. 100 сикас пыртöма «Коми Республикалöн Гöрд небöгö». Гежöд пемöсъяс ёнджыкасö олöны öтувъя заказникъясын да национальнöй паркын. 15 ю, кöні туялöны черияслысь олöмсö, лыддьыссьöны ихтиологическöй заказникъясöн. Котыртöма 12 ва памятник. Печоралöн заповеднöй мутасын олöны дона сикас черияс (ком, сиг), кульмö сьöмга.

Урал гöра бердын да Тиман бердса вевтасъясын паськалöма уна сикас карстöвöй сяма веркöсъяс. Дöзьöр улö босьтöма мича кыртъяс да мукöд история боксянь тöдчана объектъяс.

Ставыс талун кежлö - 23 ывлавыв геология памятник да öти заказник.

Национальнöй парк «Югыд ва» да Печора-Илыдзса государстволöн заповедник пырöны ывлавыв дöзьöритан мутасъяс лыдö.

«Югыд ва» парклöн зэв ыджыд мутасыс, уна мича места, кытчö вермасны волыны ывлавыв радейтысьяс. Озырлун да унапöлöслун вöснаыс сулалö Россиялöн медводдза местаясын. Тöдса 190 пöлöс лэбач, шоча паныдасьлысьяссö пыртöма «Коми Республикалöн Гöрд небöгö». Паркын артавсьö йöлöн вердысь 43 сикас пемöс, олö унапöлöс чери.

Печора-Илыдзса заповедник республикалöн мутасысь босьтö 1,7% да лоö Европаын медыджыдöн. Тшöтшкöсiнсянь гöравывсаöдз позьö аддзыны унапöлöс му выв серпас, эм ыджыд вöр ылтас. Мукöд районъясысь öтдор зэв озыр быдмöгъясöн да пемöсъясöн. Заповедниклöн мутасыс лоö «сайöдöн» уна шоч да бырны заводитысь пемöсъяслы, быдмöгъяслы. Найöс пыртöма «Коми Республикалöн Гöрд небöгö».

«Югыд ва» да Печора-Илыдзса заповедник öтувтöма «Комилöн вöрзьöдлытöм вöр» öтувъя ним улö. Найö лоöны Россияса объектъяс пиысь медводдзаяс лыдын, кодъяс пырисны ЮНЕСКО наследиелöн Ставмирса ывлавыв да культура лыддьöдлана гижöдö.