Муниципальные районы

Коми Республика пырö Россия Федерациялöн чукöрö, Рытыв-Войвыв федеральнöй кытшö да лоö öткодь правояса субъектöн.

В верховьях р. Усть-Унья, фото А.Бр. Свидерского.2.jpg
А. Б. Свидерский. В верховьях р. Усть-Унья

Орччöн сулалöны Ненецкöй асшöрлуна кытш, Ямало-Ненецкöй асшöрлуна кытш, Ханты-Мансийскöй асшöрлуна кытш, Свердловск, Киров да Архангельск обласьтъяс, Перм край.

Коми Республикаын 12 администрация район, 10 кар (республикаса тöдчанлунаыс - 8). Сыктывкар лоö юркарöн.

Республикалöн мутасыс ловзис 300 сюрс во сайын. Важолысьяс, коми йöзкостса преданиеясын найöс шуöмаöсь чудьöн, заводитiсны овмöдны Эжва вож миян эралöн 1 сюрс волöн мöд джынйын, а Печора вож - сöмын миян эралöн 2 сюрс волöн мöд джынйын.

Республикаын эм мезолит кадколаста сёысь унджык памятник (миян эраöдз 9-6 сюрс во), кодъяс пиысь медся тöдсаяс - Ульяна да Кузьвомын. Эжва да Печора заводитісны овмöдны Волго-Окскöй кык ю костсянь да Прикамьесянь. Йöз олicны эз нин рудöг увын, а ю да ты бокъясын кыпöдöм стрöйбаясын. Неолитын, бронза да водз кöрт нэмын заводитiсны котыртчыны овмöсъяс.

XI нэм кежлö коми артмöдчис кыдзи войтыр. Овмöдчисны Эжва, Емва, Висер, Сыктыв, Луза юяс пöлöн да некымын орчча обласьтъясын. IV-XVI нэмъясын сöвмöны скöт видзöм да видз-му вöдитöм. XII-XIV нэмъясын Емва, Улыс Эжва, Сыктыв да Луза юяс пöлöн кыпалöны зумыд важдырся роч овмöсъяс.

Паськалöны вузасян йитöдъяс орчча да ылi муяскöд.

60-öд вояссянь XIII нэмын комилöн «Пермь» да «Печора» му нимъяс пырисны новгородса вöлöсьт лыддьöгö, а XV нэм пом кежлö тайö мутасыс лои Роч канму юкöнöн. XVI нэмсянь коми да роч йöз öтвылысь кутiсны овмöдны Эжва йыв, Мозын да Печора вожъяс.

1708 воын некымын коми мутас вöлi пыртöма Архангельск губернияö.

Усть-Сысольск уезд, кодi котыртчис 1780 воö, пырис Вöлöгда губернияö.

XIX нэм помын Архангельск губернияысь торйöдчис Печора уезд. Тайö кад кежлас помöдз лöсялic коми войтырлöн мутасыс.

1921 вося моз 22 лунö примитiсны комилысь асшöрлун йылысь декрет. 1929 воын Коми асшöрлуна обласьт пырис выль котыртöм Войвыв крайö, Архангельск лои администрациялöн юркарöн. 1936 вося öшым 5 лунö асшöрлуна обласьт кутіс шусьыны Коми Автономнöй Сöветскöй Социалистическöй Республикаöн.

1990 вося вöльгым 23 лунö республика лои Коми ССР, 1992 вося ода кора 26 лунсянь кутiс шусьыны Коми Республика. 1994 вося урасьöм 17 лунся выль Оланподув серти Коми Республика (государство) лои Россия Федерациялöн öткодь правояса субъектöн.