Вылыс Човса уджöн мыж вештан лагер котыртлiсны 1925-öд вося март 25-öд лунö. Вылыс Човса совхоз подув вылын сiдзжö вöлi лöсьöдöма видз-му вöдитан колония. Уна сюрс морт мунiс Вылыс Човса уджöн мыж вештан лагер пыр, кодъясöс мыждылiсны каналан статья серти, унаöн на пиысь нэм кежланыс колины куйлыны татчöс шона вылын.

Унджык мыжаыс вöлi Коми муын чужлöм морт, на пиысь позьö казьтыштны татшöм паськыда тöдса йöзöс, кыдзи Коми облисполкомса вöвлöм юралысь И. Г. Коюшев, коми анбур лöсьöдысь В. А. Молодцов, гижысь В. Т. Чисталев (Тима Вень).

1933-1934 воясö Вылыс Човса колония Коми обласьтын вöлi медыджыд мыж вештан учреждениеöн, кöнi вöлi бура пуктöма видз-му овмöс удж да пу вöчöдан производство.

Ыджыд тыш воясö Вылыс Човса ИТК котырталiс мыжаясöс ыстöм кузя этапъяс, медым нуöдны найöс НКВД-са войвыв лагеръясö. Мыжаяс дасьтiсны быдсикас тьöс-плака, медводз, мый эськö ковзис война кад дырйи.

Вылыс Човса ИТК уджалö и öнi.

Сыктывкарын Пинюг станция вылын (Котлас-Вятка кöрт туй) 1929-öд воын воссьылiс да куим во мысти бöр тупкысис Пинюгса ОГПУ лагер. Сiйö вöлi ОГПУ войвывса лагеръяс веськöдлöм улын. Стрöитiс Пинюг-Сыктывкар паськыд воргаа кöрт туй, кодi нюжöдчис 265 км кузьта. Мыжаяслöн лыд: 1929-öд воын – 2300 морт, 1932-öдын – 3366 морт.

Пинюг-Сыктывкар кöрт туй вöлi шуöма стрöитны Коми автономнöй обласьтса да Войвыв крайса веськöдлысьяслöн шуöм серти, кодъяслы ёна ыштiс, мый лунвыв районъясын позяс кыпöдны гырысь вöр ылтасъяс. Туйсö нюжöдны вöлi арталöма Чибью посёлокöдз (мусир перъяан район), а сэсся Кожва сиктöдз, Сыктывкарсянь Кожваöдз артавсьö 556 км. Стрöитчöм заводитчис 1929 воын арнас Сыктывкарсянь да Пинюгсянь öтшöтш. Став уджсö вöчисны ки помысь.

1932-öд воын туйыс вöлi дась 30% вылö. Рельсъяса туй заводитiсны вöчны Пинюгсянь Луза юöдз. Кыпöдicны посёлокъяс, посъяс да мукöд пöлöс стрöйбаяс. Но буретш тайö каднас правительство шуöм серти заводитчö Беломор-Балтийскöй канал стрöитöм. Такöд йитöдын кöрт туй Пинюг-Сыктывкар вöлi шуöма дугöдлыны. Рельсъяс уберитicны, посъяс разисны, а мыж вештысьясöс нуисны вöчны канал.

Молодцов Василий Александрович (13.01.1886, Вöлöгда губерниялöн Усть-Сысольск карбердса Тентюков грезд (öнi Сыктывкар) – 31.08.1940, Сыктывкар) коми кыв туялысь, культураын да велöдöмын тöдчана уджалысь.

1918-öд воын Молодцов лöсьöдiс коми анбур, кодi лои официальнöя вынсьöдöм анбуръяс лыдын медводдзаöн. Аслас уджъясöн учёнöй пуктiс тöдчана пай коми литература кыв сöвмöдöмö. 1938-öд воын мыждiсны буржуазнöй национализмын. Кулöм бöрас бöр сетiсны бур ним.

Чисталев Вениамин Тимофеевич (20.10.1890 – 13.10.1939) чужлic Вöлöгда губерниялöн Усть-Сысольск уездса Помöсдiн сиктын (öнi Коми Республикалöн Кулöмдiн район). Велöдчис Помöсдiнса улыс тшупöда школаын, сэсся помалiс Дереваннöйса мöд тшупöда школа. Велöдысьлысь ним сетiсны сöмын 1914-öд воын.

1908-öд восянь 1913-öд воöдз велöдiс Пожöг да Помöсдiн сиктса школаясын. Тайö каднас дасьтiс "Быдманторъяс" нима роч-коми кывчукöр.

Медводдза мировöй тыш кадö служитiс сардырся армияын Украина вылын. Аскост тышса участник. Дас вит во чöж Помöсдiнса школаын велöдiс коми кыв.

1937-öд воын подувтöг мыждiсны, кулic сыктывкарса тюрьмаын. 1956-öд воын Тима Веньлы бöр сетiсны бур ним. Гу местаыс тöдтöм.