МВД СССР Щугорса лагер вöлі котыртöма 1946 воын Коми АССР Кожва районса Кырта поселокын (öні Вуктыл район). Сылöн вундöс балаыс: мупытшса озырлун корсьöм-туялöм, из шом перйöм, стрöитчöм, видз-му вöдитöм, вöр лэдзöм. Пукалысьяслöн лыдыс: 1946 воын – 2.700 морт, 1948 воын – 1.900 морт.

20-öд воясын Ухтпечлагса геологъяс корсисны Еджыд Кыртаысь из шом куйлöд да Печораса из шом куйлöдысь медводзöн тöдмасисны сыкöд. Уджаліс 3 шахта, нöшта 2 стрöитчис. Ухтпечлаг юкöм бöрын лагерыс кутіс пырны Вöркутаса лагеръяс пиö. 1946 вося вöльгым 15 лунö СССР МВД Приказ серти сійö вуджис Инталагö да лои тані №17 торъя лагерöн.

Еджыд Кыртаын «Щугоруголь» асшöр веськöдланін котыртчöм кежлö аравсис 5 лагпункт: № 1 лагпункт уджöдіс отсöг сетан предприятиеяс - энергокомбинат, öтувъя да техникаöн могмöдан юкöд, транспорт юкöд, мыйкö мында промышленнöй стрöйбаяс да оланінъяс лэптöм кузя юкöд.

1947 вося кöч тöлысьын пукалысьяслöн вынöн выль лагпунктлöн №5 стрöитчан шахталы вöлі лэптöма 5 барак (Воробьиха районын), нуöдöма векни визя кöрт туй.

«Боярскöй Яг» лагпунктсянь шöр поселкöдз ылнаыс вöлі 15 км. Тайö лагерсьыс 187 пукалысь уджалісны вöр лэдзанінын.