Öнiя Изьва муясын йöз овлöмаöсь важысянь. Та йылысь висьталöны археологъясöн аддзöм миян эраöдз VIII-V-öд нэмся оланiнъяс. Сиктлы подувсö пуктылöмаöсь, öткымын пасйöд серти, 1567-öд воö, мöд пасйöдъяс серти, 1572-öд воö, Чилимдiнысь воöм йöз. Медводдза гижöм юöрлöн кадпасыс – 1567-öд во. Документъясын гаравсьö Изьва слöбöда, кодлы подувсö пуктöмаöсь Емдiнысь да вылыс Мозынысь петöм йöз. Чилимдiнысь сёрöнджык артмöм слöбöда öдйö паськалöма да недыр кадöн ёна содöма йöзöн.

Районса вужвойтыр шуöны асьныссö изьватасöн да лыддьöны асьныссö торъя вотырсикасöн. Налöн асланыс оласног. Изьватас – кöр видзысьяс. Тулысын найö мунöны кöявны Карскöй саридздорса тундраса видзьяс вылö, гортас воöны сёр арын.

Изьватаслöн тöдчанлуныс сыын, мый уна нэм чöжöн найö лöсьöдiсны аслыспöлöс кöр видзанног, йитiсны ас культураын ненечьяслысь кöялан сямсö, рочьяслысь быдлунъя оланногсö, но кужисны та дырйи видзны зырян-комияслысь этшсö. Россияысь öтдор, некöн муюгыдас абу татшöм «бригадно-вахтöвöй» кöр видзанногыс, а подувсö сылы пуктiсны изьвасаяс, кор 2-3 нэм сайын дугдiсны овны сöмын кöялöмöн да велалiсны вайны тöвйыны кöр стадаяссö сиктö.

Öнi этшаöн тöдöны, мый XIX-öд нэм помын – XX-öд нэм заводитчигöн Изьва да Печора ю вожъяс пöлöн куйлысь быд сиктын вöлöмаöсь миллионщикъяс. Изьватаслöн ыджыд котыръяс видзöдöмаöсь Россиялöн паськыд войвыв муяс бöрся Кола кöджсянь Обь ю лайколаöдз. На киын вöлöма Россиялöн европаса войвлын став вузасянiныс. Тöргуйтöмаöсь ем-сунисöн, водкаöн, кöрттувйöн – ставнас, мый вермас вайны ыджыд сьöм, выгöда ради вермöмаöсь тöвзьыны кöр даддьöн некымын сё километра, узьны рöдвуж дорын, вöр керкаын, «байдöг чумын» - лымъя рудöгын (пещераын).

XIX-öд нэм помын –XX-öд нэм заводитчигöн замша – кöр кучик – лои зэв моднöйöн Парижын. Изьва сикт вермис лоны ыджыд промышленно-административнöй шöринöн. Но Медводдза мирöрöй война понда йитöдыс Рытыв Европакöд ори. Революция юкис йöзсö гöль да озыр вылö. Озыр йöз пöвстысь кодсюрö Кола кöджтi веськöдчисны Финляндияö, но унджыкыс веськалiсны ГУЛАГö асланыс сюсьлун да писькöслун понда, асшöра уджавны зiльöм понда, еджыдъяс дор тышкасьöм понда. Бöрынджык изьватаслöн паськыд мутасыс вöлi торйöдалöма администативнöй юкöнъяс вылö. Мусир перйигöн Изьва юлöн вож бокын артмис Ухта район, кöрт туй нюжöдöм торйöдiс Сосногорск да Печора районъяс, биару аддзöм торйöдiс войвыв юкöнсö асшöр административнöй единицаö – Усинск районö.

Талун изьватаслöн кöр стадаяс ветлöны «йöз» муястi, йирсьöны Ненецкöй автономнöй округлöн мутасын. Став тайö лоöмторыс эз дзук изьватаслысь олан сямсö, кыдзи и водзын, тулыссянь арöдз кöялöм бöрын найö воöны тöвйыны чужан керкаас.

Источники:

Республика Коми : путеводитель./ cост. С. Журавлев. - Изд. первое. - М. : Авангард, 2004. - 191с.
Жеребцов И. Л. Где ты живешь: населенные пункты Республики Коми. Историко-демографический справочник. – Сыктывкар, 1994. – 272 с.
http://www.izhma.ru/history/
http://komi.allnw.ru/izhemsky