Канпас

Княжпогост районлöн канпас вöлi зумыдмöдöма муниципальнöй район Сöветöн 2010 вося апрель 16 лунö. Официальнöй презентация выль канпаслöн мунiс Сыктывкарын Княжпогост район культура лунъясö 2010 вося июньын. Канпас петкöдлö национальнöй, топонимическöй да экономическöй аслыспöлöслунсö районлысь.

Солярнöй пас кытш сяма – шондiлöн символ, кодi вевттьöма татчöс йöзлы лöсялана коми узорöн. Шондi – югыдлöн, озырлунлöн символ. Шондi символ солярнöй пас сяма йöзкостса традиция серти вöлi оберегöн став лексьыс да вöлi шоныдлöн да югыдлöн истчникöн.

Дöрапас шöрын медшöр вöнь – Княжпогост районын кöрт туйлöн символ, кодлöн ыджыд мог йöз олöмын да экономикаын, район сöвмöмын, кодi йитö район став республикаöн да Россияöн. Вöр-ва озырлун аддзöм лоис позянаöн сöмын кöрт туй пуктöм бöрын.

Район дöрапас вылын княжескöй шапка – район нимлöн символ, кодi йитчöма важ сикт Княжпогост нимкöд, кодлöн арлыдыс 500 унджык. Татчöс легенда серти, Погост Княж вöлi котыртöма Емдiнса князьясöн ,кодъяс веськöдлiсны Вычегдаса Перымöн 1451 восянь 1502 воöдз.

Дöрапас

Дöрапас Княжпогост районлöн вöлi зумыдмöдöма муниципальнöй район Сöветöн 2010 вося апрель 16 лунö. Тайö веськыд пельöса пемыдгöрд дöра паськыднас кузьта дорö 2:3, кодi нуö шöрас водсанога визь кык рада еджыд да сьöд веськыдсэрöгъясысь, öтув пасьтаöн 1/10 дöра пасьтаысь, сы вылын кольквиж кытш, а улас кольквиж важ роч княжескöй шапка районса канпаслöн, гöрд да турунвиж посниторъясöн.