Медводдзаысь сикт йылысь гаралöма переписнöй небöгын 1646-öд воö. 1678-1685-öд воясö танi лэптöмаöсь Николай Чудотворец нима пу вичко, грездыс лоöма погостöн. 1747-öд воö погостын, вöлöсьт шöринын, олöма 125 мужичöй. 1784-öд воö погост лои сиктöн. 1822-öд воö лэптöма из вичко. 1840-öд воясö воссис приходскöй училище. 1859-öд воö Кöрткерöсын вöлi кык вичко, 825 олысь, танi жö вöлi сиктса управа. 1870-öд воясö воссис земскöй училище, 1901-öд воö – библиотека, 1904-öд воö – фельдшер пункт, 1905-öд воö – челядь приют, 1912-öд воö – мöд училище. Йöз вöдитiсны видз-му овмöс, быдтiсны скöт, кыйсисны, вöралiсны, пöрöдiсны да кылöдiсны вöр. 1939-öд воö котыртöма Кöрткерöс район, шöриннас лоис Кöрткерöс сикт. 2008-öд вося январ 1 лун кежлö танi олiс 4736 морт (48,6 % мужичöй да 50,4 % нывбаба).

Нёбдiн сикт медводдзаысь гаравсьö гижан памятникъясын 1646-öд воö. Куйлö Кöрткерöссянь 37 километраын. Республикаын тайö сиктыс нималö кыдз политикаын тöдчана мортлöн, поэт, драматург, коми театрлы подув пуктысь Виктор Савинлöн чужанiныс.

Виктор Савин (Небдiнса Виттор) вöлi медводдза гижысьяс пöвстын, кодъяслы вичмис ветлыны СССР-са гижысьяслöн Медводдза съезд вылö. Сiйö пуктiс уна вын Коми Республикалысь канмуын позянлунъяс сöвмöдöм могысь. 1937-öд воö сiйöc мыждiсны кыдз контрреволюционнöй да буржуазно-националистическöй удж котыртысьöс да ыстiсны лагеръясö 6 во кежлö. Кувсис тюрмаын. 1956-öд воö реабилитируйтöма. Гижöдъяссö йöзöдöма. В.А. Савинлöн «Варыш поз» сьыланкыв лои Коми Республика кыплöн подулöн. Сылöн чужанiнын восьтöма музей, кöнi позьö тöдмасьны олантуйöн да творчествоöн. Сиктын сувтöдöма В. Савинлы памятник, а керка местаас – паметь видзан пас.

Источники:

Республика Коми: путеводитель / [cост. С. Журавлев]. - Изд. первое. - М. : Авангард, 2004. – С. 156 - 157.

Корткерос - моя родина малая : путеводитель по историческим и памятным местам села Корткерос / Администрация муниципального района "Корткеросский", Администрация сельского поселения "Корткерос", Центр. б-ка им. М. Н. Лебедева МУ "Корткеросская ЦБС" ; [сост. Г. Р. Изъюрова]. - Корткерос, 2008. – С. 9.