Коми поэт, вуджöдчысь, журналист

Василий Иванович Елькин (Иван Вась, Домна Вась) чужис 1912-öд вося июль 15-öд лунö гöль крестьянин котырын, Сыктывкар бердса Кырув грездын. Ичöтысяньыс сiйö тöдмалiс сьöкыд удж. 1930-öд воö Василий Елькин пырö «Югöр» колхозö, кöнi сiйöс бöрйöны комсомол ячейкаса секретарöн да стенгазетса редакторö. Танi и йöзöдiс медводдза кывбуръяссö.

Армияöдз помалö газетын уджалысьяслысь курсъяс да лоö журналистöн. Уджалö Коми небöг лэдзанiнын, сэсся «Ударник» журналын. 1932-öд воö кутö веськöдлыны «Коми комсомолец» газетлöн пионеръяслы сиöм юкöнöн.

1934-36-öд воясö служитö Гöрд Армияын, Крымын. Локтöм бöрын лоö Коми АССР-лöн гижысьяс Союзын том авторъяскöд уджалысь инструкторöн.

1930-öд воясö В.И. Елькин вöлi паськыда тöдса коми поэтöн, нимöдiс чужан муын кыпыд олöмсö. 1939-öд воö лоö СССР-са гижысьяс Союзлöн членöн. Сэк жö сылöн петö «Шуд йылысь сьылöм» медводдза небöг.

Великöй Отечественнöй война заводитчигöн В. Елькинлы вöлi 29 арöс. Медводдзаяс лыдын мунiс дорйыны Чужан мусö. Сiйöс босьтiсны бригадаса штабö мöд ранга интендантöн. 1942-öд вося март 21-öд лунö уси Волховскöй фронт вылын. Куйлö братскöй гуын, Ленинград улын, Шала грезд дорын.